薪典深耕版 › 教程 › 长乐客家话 › 国外之旅
国外之旅
长乐客家话 · 第五单元 客家风情篇。课文逐字标注拼音（数字是调号）。
一、印尼（1）
荣牯：满妹，汝知得亚洲第一只共和国——兰芳共和国无？
man1 moi4, nji3 di1 ded5 a1 zhiu1 ti4 id5 zhag5 kiung4 fo2 ged5 lan2 fong1 kiung4 fo2 ged5 mau2?
满妹：我毋曾听过迩只国家，绍介下仔做得无？
ngai2 m2 cen2 tang1 guo4 ngia3 zhag5 ged5 ga1, shau4 gai4 ha4 e3 zo4 ded5 mau2?
荣牯：兰芳共和国个创始人系嘉应州个客家人罗芳伯，建立于1778年，位置在今下印尼个西加里曼丹岛。
lan2 fong1 kiung4 fo2 ged5 gai4 cong4 chi3 njin2 he4 ga1 in4 zhiu1 gai4 hag5 ga1 njin2 lo2 fong1 bag5, gen4 lib6 i1 njen2, vui4 zhi4 coi1 gim1 ha4 in4 ni2 gai4 si1 ga1 li1 man4 dan1 dau3.
满妹：恁样做么个背尾晓灭亡个？
an3 iong4 zo4 ma3 gai4 boi4 mui1 hiau3 mied6 mong2 gai4?
荣牯：无变啦，打毋过荷兰个红毛鬼啊，不过也维持矣一百过年。
mau2 bien4 la1, da3 m2 guo4 ho2 lan2 gai4 fung2 mau1 gui3 a1, bud5 guo4 ia1 vui2 chi2 e3 id5 bag5 guo4 njen2.
满妹：可惜啊。阿哥，我好想去遐位料，看下仔今下么个样。
ko3 sid5 a1. a1 go1, ngai2 hau3 siong3 hi4 gai4 vui4 liau4, kon4 ha4 e3 gim1 ha4 ma3 gai4 iong4.
荣牯：毋好想恁多，吾兜遽遽仔来计划印尼之行！
m2 hau3 siong3 an3 do1, nga1 deu1 giag5 giag5 e3 loi2 ge4 vag6 in4 ni2 zhi1 hang2!
二、印尼（2）
第一站，厥兜到矣旧时兰芳共和国个大本营——山口洋捞坤甸。其中，山口洋系以河婆客为主，擂茶十分靓食！坤甸系以梅县客为主，腌面三及第还保持有原乡个味道。第二站系爪哇岛。在华人之都泗水，厥兜参观矣有完两百年历史个惠潮嘉客家会馆。由于来自各地个客家移民都有，厥兜食著矣各具特色个客家美食，比如酿豆腐、算盘子、梅菜扣肉。最后一站，厥兜到达矣位于北苏门答腊岛个亚齐。遐埕个主流语言系客家话，令人感到十分亲切。厥兜还享受著各种各样个客家粄食。赤道上个客家风情，正经系分人回味无穷！
ti4 id5 cam4, gia1 deu1 dau4 e3 kiu4 shi2 lan2 fong1 kiung4 fo2 ged5 gai4 tai4 bun3 iang2 san1 heu3 iong2 lau2 kun1 ten4. ki2 zhung1, san1 heu3 iong2 he4 i1 ho2 po2 hag5 vui2 zhu3, lui3 ca2 shib6 fun1 ziang4 shid6! kun1 ten4 he4 i1 moi2 ien4 hag5 vui2 zhu3, iam1 men4 sam1 kib6 ti4 han2 bau3 chi2 iu1 ngen2 hiong1 gai4 mui4 tau4. ti4 nji4 cam4 he4 zau3 va1 dau3. coi1 fa2 njin2 zhi1 du1 si4 shui3, gia1 deu1 cam1 gon1 e3 iu1 von2 liong3 bag5 njen2 lid6 sii3 gai4 fui4 chau2 ga1 hag5 ga1 fui4 gon3. iu2 i1 loi2 ci4 gog5 ti4 gai4 hag5 ga1 i2 min2 du1 iu1, gia1 deu1 shid6 dau3 e3 gog5 ki4 tid6 sed5 gai4 hag5 ga1 mui1 shid6, bi3 nji2 njong4 teu4 fu4, son4 pan2 zii3, moi2 coi4 keu4 njug6. zui4 heu4 id5 cam4, gia1 deu1 dau4 tad6 e3 vui4 i1 bed5 su1 mun2 dab5 lab6 dau3 gai4 a1 ce2. gai4 tang2 gai4 zhu3 liu2 ngi1 ngian2 he4 hag5 ga1 va4, lin4 njin2 gam3 dau4 shib6 fun1 cin1 ced5. gia1 deu1 han2 hiong3 shiu4 dau3 gog5 zhung3 gog5 iong4 gai4 hag5 ga1 ban3 shid6. chag5 tau4 hong4 gai4 hag5 ga1 fung1 cin2, zhin4 gin1 he4 bun1 njin2 fui2 mui4 mau2 kiung2!
三、沙巴
上周，我去矣沙巴旅行。我从深圳宝安机场上飞机，直飞沙巴个首府：亚庇。亚庇在马来西亚还有一只又过官方个名仔：哥打根那巴鲁，我嫌长，好容易淡忘。第一日，我先去Tanjung Aru海滩搞沙公，游水仔。我看著矣飞机，临暗还看著矣日落，红红个日头安安静静沉到海肚。我食著矣出名个生肉面。第二日，去美人鱼岛沕水。迩系我头摆沕水，有滴恇，毕竟同细细仔在老屋下个河沥洗身仔毋多同。好在潜水教练系专业人士，在佢个指导下，我慢慢适应矣水底个环境。海底世界个水伶伶俐俐，看著好多靓靓个鱼仔。第三日，在路上撞著两名从根地咬过来个卡达山人，同厥兜共下去京那巴鲁公园爬神山。听讲神山系东南亚最高个山，海拔4,093米，冷天在山顶还看得著雪。沙巴人都热情得好像火等，我见著华人就用客家话，因为客家话在沙巴尽流行，沙巴华人都晓讲。讲个口音同吾兜惠阳一样样，我产生矣在故乡个幻觉。
shong4 zhiu1, ngai2 hi4 e3 sa1 ba1 li1 hang2. ngai2 cung2 chim1 zhun4 bau3 on1 gi1 chong2 shong1 fui1 gi1, chid6 fui1 sa1 ba1 gai4 shiu3 fu3: a1 bi4. a1 bi4 coi1 ma1 loi2 si1 a1 han2 iu1 id5 zhag5 iu4 guo4 gon1 fong1 gai4 miang2 e3: go1 da3 gen1 na4 ba1 lu1, ngai2 hiam2 chong2, hau3 iung2 i4 tam1 mong4. ti4 id5 njid5, ngai2 sen1 hi4 hoi3 tan1 gau3 sa1 gung1, iu2 shui3 e3. ngai2 kon4 dau3 e3 fui1 gi1, lim2 am4 han2 kon4 dau3 e3 njid5 log6, fung2 fung2 gai4 njid5 teu2 on1 on1 cin4 cin4 chim2 dau4 hoi3 du3. ngai2 shid6 dau3 e3 chud5 miang2 gai4 sang1 njug6 mien4. ti4 nji4 njid5, hi4 mui1 njin2 ng2 dau3 mid6 shui3. ngia3 he4 ngai2 teu2 bai3 mid6 shui3, iu1 did5 kong2, bid5 gin3 tung2 se4 se4 e3 coi1 lau3 vug5 ha1 gai4 ho2 lid6 se3 shin1 e3 m2 do1 tung2. hau3 coi1 ciam2 shui3 gau4 len4 he4 zhon1 ngiab6 njin2 sii4, coi1 gi2 gai4 zhi3 tau4 ha4, ngai2 man4 man4 shid5 in4 e3 shui3 dai3 gai4 fan2 gin3. hoi3 dai3 shei4 gai4 gai4 shui3 lang2 lang2 li4 li4, kon4 dau3 hau3 do1 ziang4 ziang4 gai4 ng2 e3. ti4 sam1 njid5, coi1 lu4 hong4 cong4 dau3 liong3 miang2 cung2 gen1 ti4 ngau1 guo4 loi2 gai4 ka3 tad6 san1 njin2, tung2 gia1 deu1 kiung4 ha4 hi4 gin1 na4 ba1 lu1 gung1 ien2 pa2 shin2 san1. tang1 gong3 shin2 san1 he4 dung1 nam2 a1 zui4 gau1 gai4 san1, hoi3 pad6 mi3, lang1 ten1 coi1 san1 dang3 han2 kon4 ded5 dau3 sied5. sa1 ba1 njin2 du1 njed6 cin2 ded5 hau3 ciong4 fo3 den1, ngai2 gen4 dau3 fa2 njin2 ciu4 iung4 hag5 ga1 va4, in1 vui2 hag5 ga1 va4 coi1 sa1 ba1 cin4 liu2 hang2, sa1 ba1 fa2 njin2 du1 hiau3 gong3. gong3 gai4 heu3 im1 tung2 nga1 deu1 fui4 iong2 id5 iong4 iong4, ngai2 san3 sang1 e3 coi1 gu4 hiong1 gai4 fan4 gog5.
上一课：港澳台之旅 下一课：客语歌曲
教程全部课目
站内功能