薪典深耕版 › 教程 › 長樂客家話 › 童謠兒歌
童謠兒歌
長樂客家話 · 第四單元 客家風情篇。課文逐字標注拼音（數字是調號）。
一、月光光
琦琦：月光光，照禾黃。拗蓮梗，娶新娘。娶隻新娘矮咄咄，朝朝煮飯香餑餑。娶隻新娘高筒筒，朝朝煮飯臭火燶……
ngied6 gong1 gong1, zhau4 vo2 vong2. au4 len2 gang3, ci3 sin1 njong2. ci3 zhag5 sin1 njong2 ai3 dud5 dud5, zhau1 zhau1 zhu3 fan4 hiong1 pud6 pud6. ci3 zhag5 sin1 njong2 gau1 tung2 tung2, zhau1 zhau1 zhu3 fan4 chiu4 fo3 nung1
粄仔華：哈哈，汝等惠州个“月光光”係恁樣，我等梅州个係：月光光，秀才郎。騎白馬，過蓮塘。蓮塘背，種韭菜。韭菜花，結親家。親家門前一口塘，蓄條鯉嫲八呎長。鯉嫲頭，煮酒娘。鯉嫲尾，做學堂。做个學堂四四方，讀書裔仔寫文章，寫得文章馬又走，逐得馬來天又光！
ha1 ha1, nji3 den1 fui4 zhiu1 gai4 ngied6 gong1 gong1 he4 an3 iong4, ngai2 den1 moi2 zhiu1 gai4 he4: ngied6 gong1 gong1, siu4 coi2 long2. ki2 pag6 ma1, guo4 len2 tong2. len2 tong2 boi4, zhung4 giu3 coi4. giu3 coi4 fa1, ged5 cin1 ga1. cin1 ga1 mun2 cen2 id5 heu3 tong2, hiug5 tiau2 li3 ma2 bad5 cag5 chong2. li3 ma2 teu2, zhu3 ziu3 njong2. li3 ma2 mui1, zo4 hog6 tong2. zo4 gai4 hog6 tong2 si4 si4 fong1, tug6 shu1 lai4 e3 sia3 vun2 zhong1, sia3 ded5 vun2 zhong1 ma1 iu4 zeu3, giug5 ded5 ma1 loi2 ten1 iu4 gong1!
琦琦：我還知一首：月光光，好種姜。姜必目，好種竹。竹開花，好種瓜。瓜吂大，孫仔摘來賣。賣著錢，學打棉。棉線斷，學打磚。磚對折，學打鐵。鐵生黸，學遲豬。豬會走，學遲狗。狗會咬，學打鳥。鳥會飛，飛到大樹下，拈著一隻爛西瓜。煮分親家食，瀉著一廳下。
ngai2 han2 di1 id5 shiu3: ngied6 gong1 gong1, hau3 zhung4 giong1. giong1 bid5 mug5, hau3 zhung4 zhug5. zhug5 hoi1 fa1, hau3 zhung4 gua1. gua1 mang2 tai4, sun1 e3 zag5 loi2 mai4. mai4 dau3 cien2, hog6 da3 mien2. mien2 sien4 ton1, hog6 da3 zhon1. zhon1 dui4 zhed5, hog6 da3 ted5. ted5 sang1 lu2, hog6 chi2 zhu1. zhu1 voi4 zeu3, hog6 chi2 geu3. geu3 voi4 ngau1, hog6 da3 diau1. diau1 voi4 bui1, bui1 dau4 tai4 shu4 ha1, ngiam1 dau3 id5 zhag5 lan4 si1 gua1. zhu3 bun1 cin1 ga1 shid6, sia4 dau3 id5 tiang1 ha1.
粄仔華：哈哈，邇首童謠教育汝做事情愛堅持，毋係就麼个都做毋成。
ha1 ha1, ngia3 shiu3 tung2 iau2 gau4 iug5 nji3 zo4 sii4 cin2 oi4 gen1 chi2, m2 he4 ciu4 ma3 gai4 du1 zo4 m2 shang2.
琦琦：粄仔華哥哥，汝解我聽，做麼个愛安做“月光光”？
ban3 e3 fa2 go1 go1, nji3 gai3 ngai2 tang1, zo4 ma3 gai4 oi4 on1 zo4 ngied6 gong1 gong1
粄仔華：“月光”就係“月亮”， “光”就係“明亮”， “月光、光”就係“月亮十分明亮”！
ngied6 gong1 ciu4 he4 ngied6 liong4 gong1 ciu4 he4 min2 liong4 ngied6 gong1, gong1 ciu4 he4 ngied6 liong4 shib6 fun1 min2 liong4
琦琦：哇，原來係“月光好光”个意思，真係靚！
va1, ngen2 loi2 he4 ngied6 gong1 hau3 gong1 gai4 i4 sii1, zhin1 he4 ziang4!
二、民間歌謠
《蟾蜍羅》蟾蜍羅，過過過。毋讀書，無老婆。《鷓鴣鷓鷓》鷓鴣鷓鷓，荷水淋蔗。淋蔗肚飢，嫁到江西。《缺牙耙》缺牙耙，耙豬屎。耙分阿爸，種金瓜。《掞掞排》掞掞排，掞掞排，皇帝妹，嫁分我。我毋愛，我愛精精豬肉撈咸菜。《阿鵲仔》阿鵲仔，打翻車，一打打到阿姊門碫下。阿姊偷等笑，笑成一朵花。《釣檳彎彎》釣檳彎彎，釣著大鯇；釣檳直直，釣無好食；釣檳短短，釣著鴨卵；釣檳拱拱，釣著一水桶。《羊仔咩咩》羊仔咩咩，四腳齊齊。三更半夜，四更南蛇。五更老虎，老虎來矣無？毋曾！ （來矣！ ）《七星姑》七星姑，七姊妹。打開園門偷摘菜。摘一皮，留一皮。留到過年嫁滿姨。《阿鵲教烏鷯》大做樣，細學樣，上樑歪，下樑倒。毋好阿鵲教烏鷯，教來教去腳吊吊。《阿妹妹》阿妹妹，睡目目，阿爸投圩斫豬肉。狗一逐，蹶上屋，跌呀落，掩掩撲。《排排坐》排排坐，唱山歌，阿爸打鼓我打鑼。排排坐，唱山歌，邇邊唱來遐邊和。《火掞蟲》火掞蟲，唧唧蟲。屎窟尾頭吊燈籠。燈籠光，照四方。四方暗，照田坎。《月光嘩嘩》月光嘩嘩，細妹煮茶。阿哥兜凳，人客食茶。滿姑洗身，跌矣手帕。麼人拈著，無人敢話。毋使打，毋使罵，十七十八我會嫁。嫁到哪裡去？嫁到嶺崗背。狐狸燒火貓炒菜，雞公礱谷狗踏碓，豬嫲荷水淋青菜。《禾鷝仔》禾鷝仔，嘴哇哇。無米食，碓間下。無油食，油槽下。無床眠，睡樹杈。無被蓋，樹葉遮。禾鷝仔，嘴哇哇。上桃樹，啄桃花。桃花李花盡汝啄，莫來啄我牛眼荔枝花。牛眼留來拐妹仔，荔枝留來轉妹家。《拍手歌》一拍一，松樹尾上一稈筆。兩拍兩，兩子親家打巴掌。三拍三，汝著羅裙我著衫。四拍四，阿公門前啜把戲。五拍五，五月龍船擂大鼓。六拍六，河背村莊火燒屋。七拍七，新做眠床上油漆。八拍八，窮苦人家捧粥鉢。九拍九，做月婦女食黃酒。十拍十，甘椒辣著出目汁。《等郎妹》十八滿姑三歲郎，魯魯勒勒勒上床。三餐愛我飼粥飯，朝晚愛我洗衣裳。等得郎花開來妹花謝，等得郎君大時妹已兩鬢霜。《月光光》月光光，月光光。船來等，轎來扛。一扛扛到河中心，蝦公老蟹拜觀音。觀音腳下一墩禾，打著三擔過一籮。籮面上，一本書，送分阿哥去讀書。讀著兩條紅絲線，送分阿嫂做鞋面。上个鞋面正滴滴，送分阿舅做生日。《擸翻歌》擸翻歌，擸翻歌，看著姐公娶姐婆。阿母行嫁我燒火，先養我正養阿哥。天冷就愛著短褲，天熱記穩著襖婆。兜梯下井取鳥竇，上樹掀窟捉滑哥。鴨仔上山食青草，羊牯下河吮坑螺。雞公生春雞嫲啼，西出日頭東落坡。老鼠拖貓蛇吞象，啞仔唱歌阿聾聽。《羞羞羞》羞羞羞，無面見阿舅。阿舅翻啊轉，拿出兩隻紅雞卵，話我食矣好去轉。羞羞羞，貓公捉湖鰍。湖鰍鑽入泥，貓公嘴豺豺。
sham2 shu2 lo2 sham2 shu2 lo2, guo4 guo4 guo4. m2 tug6 shu1, mau2 lau3 po2. zha4 gu1 zha4 zha4 zha4 gu1 zha4 zha4, ho2 shui3 lim2 zha4. lim2 zha4 du3 gi1, ga4 dau4 gong1 si1. ked5 nga2 pa2 ked5 nga2 pa2, pa2 zhu1 shi3. pa2 bun1 a1 ba1, zhung4 gim1 gua1. iam4 iam4 pai2 iam4 iam4 pai2, iam4 iam4 pai2, vong2 di4 moi4, ga4 bun1 ngai2. ngai2 m2 oi4, ngai2 oi4 ziang1 ziang1 zhu1 njug6 lau2 ham2 coi4. a1 ciog5 e3 a1 ciog5 e3, da3 fan1 cha1, id5 da3 da3 dau4 a1 zi3 mun2 don4 ha1. a1 zi3 teu1 den3 siau4, siau4 shin2 id5 duo3 fa1. diau4 bin1 van1 van1 diau4 bin1 van1 van1, diau4 dau3 tai4 van1; diau4 bin1 chid6 chid6, diau4 mau2 hau3 shid6; diau4 bin1 don3 don3, diau4 dau3 ab5 lon3; diau4 bin1 gung3 gung3, diau4 dau3 id5 shui3 tung3. iong2 e3 mie1 mie1 iong2 e3 mie1 mie1, si4 giog5 ce2 ce2. sam1 gang1 ban4 ia4, si4 gang1 nam2 sha2. ng3 gang1 lau4 fu3, lau4 fu3 loi2 e3 mau2? m2 cen2 loi2 e3 cid5 sin1 gu1 cid5 sin1 gu1, cid5 zi3 moi4. da3 hoi1 ien2 mun2 teu1 zag5 coi4. zag5 id5 pi2, liu2 id5 pi2. liu2 dau4 guo4 njen2 ga4 man1 i2. a1 ciog5 gau1 vu1 liau4 tai4 zo4 iong4, se4 hog6 iong4, shong4 liong2 ngau2, ha1 liong2 dau3. m2 hau3 a1 ciog5 gau1 vu1 liau4, gau1 loi2 gau1 hi4 giog5 diau4 diau4. a1 moi4 moi4 a1 moi4 moi4, shoi4 mug5 mug5, a1 ba1 teu2 hi1 zhog5 zhu1 njug6. geu3 id5 giug5, ked6 shong1 vug5, ded5 ha1 log6, em1 em1 pug5. pai2 pai2 co1 pai2 pai2 co1, chong4 san1 go1, a1 ba1 da3 gu3 ngai2 da3 lo2. pai2 pai2 co1, chong4 san1 go1, ngia3 ben1 chong4 loi2 gai4 ben1 fo2. fo3 iam4 chung2 fo3 iam4 chung2, zid5 zid5 chung2. shi3 fud5 mui1 teu2 diau4 den1 lung2. den1 lung2 gong1, zhau4 si4 fong1. si4 fong1 am4, zhau4 ten2 kam3. ngied6 gong1 fa2 fa2 ngied6 gong1 fa2 fa2, se4 moi4 zhu3 ca2. a1 go1 deu1 den4, njin2 hag5 shid6 ca2. man1 gu1 se3 shin1, ded5 e3 shiu3 pa4. ma3 njin2 ngiam1 dau3, mau2 njin2 gam3 va4. m2 sii3 da3, m2 sii3 ma4, shib6 cid5 shib6 bad5 ngai2 voi4 ga4. ga4 dau4 nai4 li3 hi4? ga4 dau4 liang1 gong1 boi4. fu2 li2 shau1 fo3 miau4 cau3 coi4, gai1 gung1 lung2 gug5 geu3 tab6 doi4, zhu1 ma2 ho2 shui3 lim2 ciang1 coi4. vo2 bid5 e3 vo2 bid5 e3, zhoi4 va1 va1. mau2 mi3 shid6, doi4 gan1 ha1. mau2 iu2 shid6, iu2 cau2 ha1. mau2 cong2 min2, shoi4 shu4 ca1. mau2 pi1 goi4, shu4 iab6 zha1. vo2 bid5 e3, zhoi4 va1 va1. shong1 tau2 shu4, dug5 tau2 fa1. tau2 fa1 li3 fa1 cin4 nji3 dug5, mog6 loi2 dug5 ngai2 ngiu2 ngan3 li4 zhi1 fa1. ngiu2 ngan3 liu2 loi2 kai3 moi4 e3, li4 zhi1 liu2 loi2 zhon3 moi4 ga1. pag5 shiu3 go1 id5 pag5 id5, ciung2 shu4 mui1 hong4 id5 gon3 bid5. liong3 pag5 liong3, liong3 zii3 cin1 ga1 da3 ba1 zhong3. sam1 pag5 sam1, nji3 zhog5 lo2 kiun2 ngai2 zhog5 sam1. si4 pag5 si4, a1 gung1 mun2 cen2 chod5 ba3 hi4. ng3 pag5 ng3, ng3 ngied6 lung2 shon2 lui3 tai4 gu3. lug5 pag5 lug5, ho2 boi4 cun1 zong1 fo3 shau1 vug5. cid5 pag5 cid5, sin1 zo4 min2 cong2 shong1 iu2 cid5. bad5 pag5 bad5, kiung2 ku3 njin2 ga1 pung3 zhug5 bad5. giu3 pag5 giu3, zo4 ngied6 fu4 nji3 shid6 vong2 ziu3. shib6 pag5 shib6, gam1 ziau1 lad6 dau3 chud5 mug5 zhib5. den3 long2 moi4 shib6 bad5 man1 gu1 sam1 soi4 long2, lu1 lu1 led6 led6 led6 shong1 cong2. sam1 con1 oi4 ngai2 ci4 zhug5 fan4, zhau1 man1 oi4 ngai2 se3 i1 shong2. den3 ded5 long2 fa1 hoi1 loi2 moi4 fa1 cia4, den3 ded5 long2 giun1 tai4 shi2 moi4 i3 liong3 bin4 song1. ngied6 gong1 gong1 ngied6 gong1 gong1, ngied6 gong1 gong1. shon2 loi2 den3, kiau4 loi2 gong1. id5 gong1 gong1 dau4 ho2 dung4 sim1, ha2 gung1 lau4 hai3 bai4 gon1 im1. gon1 im1 giog5 ha1 id5 dun1 vo2, da3 dau3 sam1 dam1 guo4 id5 lo2. lo2 mien4 hong4, id5 bun3 shu1, sung4 bun1 a1 go1 hi4 tug6 shu1. tug6 dau3 liong3 tiau2 fung2 sii1 sien4, sung4 bun1 a1 sau3 zo4 hai2 mien4. shong4 gai4 hai2 mien4 zhang4 did5 did5, sung4 bun1 a1 kiu1 zo4 sang1 njid5. lab5 fan1 go1 lab5 fan1 go1, lab5 fan1 go1, kon4 dau3 zia3 gung1 ci3 zia3 po2. a1 mi1 hang2 ga4 ngai2 shau1 fo3, sen1 iong1 ngai2 zhang4 iong1 a1 go1. ten1 lang1 ciu4 oi4 zhog5 don3 fu4, ten1 njed6 gi4 vun3 zhog5 au3 po2. deu1 toi1 ha1 ziang3 ci3 diau1 deu4, shong1 shu4 hien1 fud5 zog5 vad6 go1. ab5 e3 shong1 san1 shid6 ciang1 cau3, iong2 gu3 ha4 ho2 cion3 hang1 lo2. gai1 gung1 sang1 chun1 gai1 ma2 te2, si1 chud5 njid5 teu2 dung1 log6 po1. lau4 chu3 to1 miau4 sha2 tun1 siong4, a3 e3 chong4 go1 a1 lung1 tang1. siu1 siu1 siu1 siu1 siu1 siu1, mau2 mien4 gen4 a1 kiu1. a1 kiu1 fan1 a4 zhon3, na1 chud5 liong3 zhag5 fung2 gai1 lon3, va4 ngai2 shid6 e3 hau3 hi4 zhon3. siu1 siu1 siu1, miau4 gung1 zog5 fu2 ciu1. fu2 ciu1 zon4 njib6 nai2, miau4 gung1 zhoi4 sai2 sai2.
上一課：傳統節日 下一課：童話故事
教程全部課目
站內功能