薪典深耕版 › 教程 › 長樂客家話 › 童話故事
童話故事
長樂客家話 · 第四單元 客家風情篇。課文逐字標注拼音（數字是調號）。
一、老虎姐婆
遐時有兩姊妹愛去邏姐婆，嶺崗肚裡草濃到盡，庰等條老虎。老虎著好衫裙，化著隻老太仔。兩姊妹跟佢， “汝係麼人啊？ ”老虎啜厥兩家： “我係若姐婆咩，阿妹！ ”兩姊妹好精： “正毋係，吾姐婆嘴角有隻痣！ ”老虎在腳下拗著條簕，粘等嘴角： “嘛，痣！ ”樹陰遮等，兩姊妹看毋清，敢藤等老虎行到屋裡。暗晡夜，兩姊妹同姐婆睡目，姐婆座出，阿姐座落，老弟座中心。半夜仔，老虎食老弟， 嚙厥骨頭，阿姐聽著矣： “阿姐婆，係麼个嗦嗦條響？ ”“阿姐婆食炒黃豆咩。”無幾久，老虎嚙老弟个腳。“阿姐婆，係麼个嗒嗒條響？ ”“我食咸豆角呢！ ”老弟个血浸著一張眠床都濕矣， “姐婆邇係麼？ ”“若老弟遺尿咩。”阿姐摸毋著佢老弟，就訥： “邇隻姐婆話係老虎，食矣吾老弟！ ”佢啜老虎講愛去屙尿，遽遽仔走啊門背去。天光朝老虎看阿姐恁難轉，去尋佢，看著阿姐蹶上樹頂去矣，也蹶上樹。阿姐講， “姐婆，我來同汝梳頭。”梳一下，就滾厥毛在遐樹卡綯一隻結。绹好撳梳仔覅啊下， “吾梳仔跌矣！ ”樹頂飆啊下，上緊溜等走。老虎想逐佢，吂知頭顱毛敢綰等樹頂，搏命摒。摒脫矣，頭顱都捋皮出血囖。老虎撞著隻荷石灰水个老伯仔，喊佢止血。老阿伯正無恁戇，舀著勺嫲石灰水就淋啊去，腌著老虎痛瘑痛絕，老阿伯卯佢落塘水。老虎焗死矣，厥頭顱化作蚊仔飛上天，尾化作湖蜞游落塘底，照樣食人血。生愛害人，死也愛害人！今樣啊，細人仔毋肯睡目，大人就喊： “老虎姐婆來矣囖！ ”細人仔就會嚇著鑚落被竇去。
gai4 shi2 iu1 liong3 zi3 moi4 oi4 hi4 la2 zia3 po2, liang1 gong1 du3 li3 cau3 ngiung2 dau4 cin4, pin4 den3 tiau2 lau4 fu3. lau4 fu3 zhog5 hau3 sam1 kiun2, fa4 dau3 zhag5 lau3 tai4 e3. liong3 zi3 moi4 gen1 gi2 nji3 he4 ma3 njin2 a1 lau4 fu3 chod5 gia1 liong3 ga1 ngai2 he4 nja1 zia3 po2 mie1, a1 moi4 liong3 zi3 moi4 hau3 zin1 zhang4 m2 he4, nga1 zia3 po2 zhoi4 gog5 iu1 zhag5 zhi4 lau4 fu3 coi1 giog5 ha1 au3 dau3 tiau2 ned5, ngiam2 den3 zhoi4 gog5 ma2, zhi4 shu4 im1 zha1 den3, liong3 zi3 moi4 kon4 m2 cin1, gam3 ten2 den3 lau4 fu3 hang2 dau4 vug5 li3. am4 bu1 ia4, liong3 zi3 moi4 tung2 zia3 po2 shoi4 mug5, zia3 po2 co4 chud5, a1 zia3 co4 log6, lau3 tai1 co4 dung4 sim1. ban4 ia4 e3, lau4 fu3 shid6 lau3 tai1 gia1 gud5 teu2, a1 zia3 tang1 dau3 e3 a1 zia3 po2, he4 ma3 gai4 so1 so1 tiau2 hiong3 a1 zia3 po2 shid6 cau3 vong2 teu4 mie1 mau2 gi3 giu3, lau4 fu3 lau3 tai1 gai4 giog5 a1 zia3 po2, he4 ma3 gai4 dab6 dab6 tiau2 hiong3 ngai2 shid6 ham2 teu4 gog5 ni2 lau3 tai1 gai4 hed5 zim4 dau3 id5 zhong1 min2 cong2 du1 shib5 e3 zia3 po2 ngia3 he4 ma3 nja1 lau3 tai1 lai2 ngiau4 mie1 a1 zia3 mo1 m2 dau3 gi2 lau3 tai1, ciu4 nud6 ngia3 zhag5 zia3 po2 va4 he4 lau4 fu3, shid6 e3 nga1 lau3 tai1 gi2 chod5 lau4 fu3 gong3 oi4 hi4 o1 ngiau4, giag5 giag5 e3 zeu3 a4 mun2 boi4 hi4. ten1 gong1 zhau1 lau4 fu3 kon4 a1 zia3 an3 nan2 zhon3, hi4 cim2 gi2, kon4 dau3 a1 zia3 ked6 shong1 shu4 dang3 hi4 e3, ia1 ked6 shong1 shu4. a1 zia3 gong3 zia3 po2, ngai2 loi2 tung2 nji3 so1 teu2 so1 id5 ha4, ciu4 gun3 gia1 mau1 coi1 gai4 shu4 ka3 tau2 id5 zhag5 gid5. tau2 hau3 kim3 so1 e3 fud5 a4 ha1 nga1 so1 e3 ded5 e3 shu4 dang3 biau1 a4 ha1, shong1 gin3 liu4 den3 zeu3. lau4 fu3 siong3 giug5 gi2, mang2 di1 teu2 na1 mau1 gam3 van4 den3 shu4 dang3, bog5 miang4 bin4. bin4 tod5 e3, teu2 na1 du1 lod5 pi2 chud5 hed5 lo2. lau4 fu3 cong4 dau3 zhag5 kai1 shag6 foi1 shui3 gai4 lau3 bag5 e3, ham4 gi2 zhi3 hed5. lau3 a1 bag5 zhang4 mau2 am3 ngong4, iau3 dau3 shog6 ma2 shag6 foi1 shui3 ciu4 lim2 a1 hi4, iab5 dau3 lau4 fu3 tung4 guo1 tung4 cied6, lau3 a1 bag5 mau3 gi2 log6 tong2 shui3. lau4 fu3 gug6 si3 e3, gia1 teu2 na1 fa4 zog5 mun1 e3 bui1 shong1 ten1, mui1 fa4 zog5 fu2 ki2 iu2 log6 tong2 dai3, zhau4 iong4 shid6 njin2 hed5. sang1 oi4 hoi4 njin2, si3 ia1 oi4 hoi4 njin2! gim1 iong4 a1, se4 njin2 e3 m2 hen3 shoi4 mug5, tai4 njin2 ciu4 hem1 lau4 fu3 zia3 po2 loi2 e3 lo2 se4 njin2 e3 ciu4 voi4 hag5 dau3 zon4 log6 pi1 deu4 hi4.
二、熊家嫲
百過年前，有隻妹子人，厥母過矣身，剩著兩子爺過日仔。背尾，有隻媒人婆紹介矣隻婦女人分阿爸做駁腳婦娘。吂知噻，邇隻婦女人敢係熊家化著个。熊家看著老公毋曾淡忘先頭个婦娘，惜到盡妹仔，又毋搭自家，故所惱絕矣佢等。佢長日偷偷仔打妹仔，正十五歲个妹仔，又馴又細膽，毋敢投厥爸。妹仔同一條牛盡好，供佢食草，同佢料。看著妹仔偷偷仔叫，牛也出眼汁。有日仔，阿爸滯著病眠等眠床，熊家就想上緊制死妹仔佢。佢僅晾燥个湖蜞剁銳，撈啊番薯飯去，牙蕉葉包等分妹仔，喊佢去掌牛。熊家話： “汝掌牛渴矣就食河壩水，餓矣就食番薯飯。”妹仔做攰矣透涼，一啖水一啖飯。隔無幾久，妹仔肚胈痛到死，條打條又肥又肭个湖蜞打妹仔个鼻公、耳公、嘴嫲鑚出來，妹仔昏著矣。牛看著矣就用舌嫲舐走湖蜞，樣般喊妹仔都毋醒。阿爸聽著熊家害死矣厥妹仔，激死矣。有日仔火蛇攝，雷公霹死矣邇隻壞心肝个熊家。今下啊，大人看著細滿仔頭蓬絲搲、上鈕搭下鈕，還曉話佢： “像條熊家等！ ”
bag5 guo4 njen2 cen2, iu1 zhag5 moi4 zii3 njin2, gia1 mi1 guo4 e3 shin1, in4 dau3 liong3 zii3 ia2 guo4 njid5 e3. boi4 mui1, iu1 zhag5 moi2 njin2 po2 shau4 gai4 e3 zhag5 fu4 nji3 njin2 bun1 a1 ba1 zo4 bog5 giog5 fu4 njong2. mang2 di1 sed5, ngia3 zhag5 fu4 nji3 njin2 gam3 he4 iung2 ga1 fa4 dau3 gai4. iung2 ga1 kon4 dau3 lau3 gung1 m2 cen2 tam1 mong4 sen1 teu2 gai4 fu4 njong2, sid5 dau4 cin4 moi4 e3, iu4 m2 dab5 ci4 ga1, gu4 so3 nau1 cied6 e3 gi2 den3. gi2 chong2 njid5 teu1 teu1 e3 da3 moi4 e3, zhang4 shib6 ng3 soi4 gai4 moi4 e3, iu4 sun2 iu4 se4 dam3, m2 gam3 teu2 gia1 ba1. moi4 e3 tung2 id5 tiau2 ngiu2 cin4 hau3, giung4 gi2 shid6 cau3, tung2 gi2 liau4. kon4 dau3 moi4 e3 teu1 teu1 e3 giau4, ngiu2 ia1 chud5 ngan3 zhib5. iu1 njid5 e3, a1 ba1 zhei4 dau3 piang4 min2 den3 min2 cong2, iung2 ga1 ciu4 siong3 shong1 gin3 zhi4 si3 moi4 e3 gi2. gi2 giun3 lang2 zau1 gai4 fu2 ki2 dog6 iui, lau2 a4 fan1 shu3 fan4 hi4, nga2 ziau1 iab6 bau1 den3 bun1 moi4 e3, ham4 gi2 hi4 zhong3 ngiu2. iung2 ga1 va4 nji3 zhong3 ngiu2 hod5 e3 ciu4 shid6 ho2 ba4 shui3, ngo4 e3 ciu4 shid6 fan1 shu3 fan4 moi4 e3 zo4 kioi4 e3 teu4 liong2, id5 tam4 shui3 id5 tam4 fan4. gag5 mau2 gi3 giu3, moi4 e3 du3 pad6 tung4 dau4 si3, tiau2 da3 tiau2 iu4 pui2 iu4 neb5 gai4 fu2 ki2 da3 moi4 e3 gai4 pi4 gung1, nji3 gung1, zhoi4 ma2 zon4 chud5 loi2, moi4 e3 fun2 dau3 e3. ngiu2 kon4 dau3 e3 ciu4 iung4 shed6 ma2 shei1 zeu3 fu2 ki2, iong4 ban1 ham4 moi4 e3 du1 m2 siang3. a1 ba1 tang1 dau3 iung2 ga1 hoi4 si3 e3 gia1 moi4 e3, gid5 si3 e3. iu1 njid5 e3 fo3 sha2 ngiab5, lui2 gung1 piag5 si3 e3 ngia3 zhag5 fai4 sim1 gon1 gai4 iung2 ga1. gim1 ha4 a1, tai4 njin2 kon4 dau3 se4 man1 e3 teu2 pung2 sii1 ia3, shong4 niu3 dab5 ha1 niu3, han2 hiau3 va4 gi2 ciong4 tiau2 iung2 ga1 den1
上一課：童謠兒歌 下一課：民間故事
教程全部課目
站內功能