薪典深耕版 › 教程 › 長樂客家話 › 民間故事
民間故事
長樂客家話 · 第四單元 客家風情篇。課文逐字標注拼音（數字是調號）。
一、三斤狗
古時有隻人屋下窮，又奀又瘦，別人家就喊佢“三斤狗”。三斤狗有隻裔仔，到南洋做工去矣，信都無轉。有日仔，三斤狗無米食，去同隔離个李伯母借米。三斤狗好話講盡矣，李伯母毋肯借，三斤狗凈好轉屋下。無幾久，李伯母就帶等叔伯兄弟到三斤狗屋下，話三斤狗偷矣厥金釵。三斤狗話自家無偷，李伯母毋信，完隻屋下都抄矣，毋曾尋著，還係硬講係三斤狗偷个。年三十晡夜，三斤狗無錢斫豬肉，同賣豬肉个賒矣一斤豬肉，放落鑊頭去煠。吂知張老闆來喊佢還債，三斤狗講佢無錢，張老闆打開鑊蓋，講： “無錢哪來个豬肉？ ”三斤狗講： “賒著來敬祖公个！ ”張老闆拿著豬肉就走，還掞一搲灰到豬肉湯裡。三斤狗豬肉湯都無食就上牀睡目，邇下聽著敲門聲，三斤狗開門看著裔仔帶等四擔“番貨”轉。天吂光，三斤狗兩子爺就扛等兩糞箕花邊來敬祖公，齊家看著都喊佢“三伯公”。三斤狗笑， “上夜係三斤狗，下夜就係三伯公囖！ ”敬矣祖公以後，齊家都喊三斤狗去食飯，三斤狗都去食，講： “打幫吾裔仔！ ”
gu3 shi2 iu1 zhag5 njin2 vug5 ha1 kiung2, iu4 ngan1 iu4 seu4, pied6 njin2 ga1 ciu4 ham4 gi2 sam1 gin1 geu3 sam1 gin1 geu3 iu1 zhag5 lai4 e3, dau4 nam2 iong2 zo4 gung1 hi4 e3, sin4 du1 mau2 zhon3. iu1 njid5 e3, sam1 gin1 geu3 mau2 mi3 shid6, hi4 tung2 gag5 li2 gai4 li3 bag5 mi1 zia4 mi3. sam1 gin1 geu3 hau3 va4 gong3 cin4 e3, li3 bag5 mi1 m2 hen3 zia4, sam1 gin1 geu3 cang1 hau3 zhon3 vug5 ha1. mau2 gi3 giu3, li3 bag5 mi1 ciu4 dai4 den3 shug5 bag5 hiung1 ti4 dau4 sam1 gin1 geu3 vug5 ha1, va4 sam1 gin1 geu3 teu1 e3 gia1 gim1 cai1. sam1 gin1 geu3 va4 ci4 ga1 mau2 teu1, li3 bag5 mi1 m2 sin4, von2 zhag5 vug5 ha1 du1 cau1 e3, m2 cen2 cim2 dau3, han2 he4 ngang4 gong3 he4 sam1 gin1 geu3 teu1 gai4. njen2 sam1 shib6 bu1 ia4, sam1 gin1 geu3 mau2 cien2 zhog5 zhu1 njug6, tung2 mai4 zhu1 njug6 gai4 sha1 e3 id5 gin1 zhu1 njug6, biong4 log6 vog6 teu2 hi4 sab6. mang2 di1 zhong1 lau3 ban3 loi2 ham4 gi2 van2 zai4, sam1 gin1 geu3 gong3 gi2 mau2 cien2, zhong1 lau3 ban3 da3 hoi1 vog6 goi4, gong3 mau2 cien2 nai4 loi2 gai4 zhu1 njug6 sam1 gin1 geu3 gong3 sha1 dau3 loi2 gin4 zu3 gung1 gai4 zhong1 lau3 ban3 na1 dau3 zhu1 njug6 ciu4 zeu3, han2 iam4 id5 ia3 foi1 dau4 zhu1 njug6 tong1 li3. sam1 gin1 geu3 zhu1 njug6 tong1 du1 mau2 shid6 ciu4 shong1 cong2 shoi4 mug5, ngia3 ha4 tang1 dau3 kau4 mun2 shang1, sam1 gin1 geu3 hoi1 mun2 kon4 dau3 lai4 e3 dai4 den3 si4 dam1 fan1 fo4 zhon3. ten1 mang2 gong1, sam1 gin1 geu3 liong3 zii3 ia2 ciu4 gong1 den3 liong3 bun4 gi1 fa1 ben1 loi2 gin4 zu3 gung1, ce2 ga1 kon4 dau3 du1 ham4 gi2 sam1 bag5 gung1 sam1 gin1 geu3 siau4 shong4 ia4 he4 sam1 gin1 geu3, ha4 ia4 ciu4 he4 sam1 bag5 gung1 lo2 gin4 e3 zu3 gung1 i1 heu4, ce2 ga1 du1 ham4 sam1 gin1 geu3 hi4 shid6 fan4, sam1 gin1 geu3 du1 hi4 shid6, gong3 da3 bong1 nga1 lai4 e3
二、騙豬肉
有古仔講，有隻好精个人，安做鄉狗。有一日，鄉狗同叔公去賣豬肉。鄉狗十分想食肉，佢就行在叔公先頭，大聲喊： “賣豬肉囖！賣豬肉囖！ ”一看著人就細細聲講： “千祈毋好斫叔公个豬肉，叔公个豬肉係隔夜个，餿个！ ”別人家就毋敢斫叔公个豬肉。叔公荷等豬肉在尾下跟等，行矣一日，一斤豬肉都賣毋出去。暗晡夜叔公講： “毋曉解！做麼吾豬肉賣毋出？ ”叔公个豬肉淨好分鄉狗拿矣轉去食，鄉狗就恁樣啜著矣叔公个豬肉。
iu1 gu3 e3 gong3, iu1 zhag5 hau3 zin1 gai4 njin2, on1 zo4 hiong1 geu3. iu1 id5 njid5, hiong1 geu3 tung2 shug5 gung1 hi4 mai4 zhu1 njug6. hiong1 geu3 shib6 fun1 siong3 shid6 njug6, gi2 ciu4 hang2 coi1 shug5 gung1 sen1 teu2, tai4 shang1 hem1 mai4 zhu1 njug6 lo2! mai4 zhu1 njug6 lo2 id5 kon4 dau3 njin2 ciu4 se4 se4 shang1 gong3 cen1 ki2 m2 hau3 zhog5 shug5 gung1 gai4 zhu1 njug6, shug5 gung1 gai4 zhu1 njug6 he4 gag5 ia4 gai4, siu1 gai4 pied6 njin2 ga1 ciu4 m2 gam3 zhog5 shug5 gung1 gai4 zhu1 njug6. shug5 gung1 kai1 den3 zhu1 njug6 coi1 mui1 ha1 gen1 den3, hang2 e3 id5 njid5, id5 gin1 zhu1 njug6 du1 mai4 m2 chud5 hi4. am4 bu1 ia4 shug5 gung1 gong3 m2 hiau3 gai3! zo4 ma3 nga1 zhu1 njug6 mai4 m2 chud5 shug5 gung1 gai4 zhu1 njug6 ciang4 hau3 bun1 hiong1 geu3 na1 e3 zhon3 hi4 shid6, hiong1 geu3 ciu4 an3 iong4 chod5 dau3 e3 shug5 gung1 gai4 zhu1 njug6.
四、語法
1、分（bun1）
詞彙：分（bun1） 含義：給；被。 用法：惠州部分地區讀作“bin1”。 例句：若蘋果分我食矣，送轉隻雪梨分汝。
上一課：童話故事 下一課：美味佳餚
教程全部課目
站內功能